• Home
  • / Language
  • / ٹی وی لائسنس کے بارے میں معلومات

ٹی وی لائسنس کے بارے میں معلومات

اگر آپ ٹی وی یا کسی اور آلے پر دکھائے جا رہے پروگراموں کو کسی بھی ڈیوائس پریا کسی آن لائن ٹی وی سروس پر دیکھتے یا ریکارڈ کرتے ہیں تو یہ ضروری ہے کہ آپ کے پاس ایک ٹی وی لائسنس موجود ہو۔ ایک معیاری رنگین ٹی وی لائسنس کی قیمت 145.50£ ہے - آپ یہ رقم یک مشت ادا کرسکتے ہیں یا اس کے لیے قسطوں میں ادائیگی کا انتخاب کرسکتے ہیں۔ یہ صفحہ آپ کو ادائیگی کے مختلف طریقوں، کاروبار کے لیے لائسنس، اور اس بارے میں بھی بتاتا ہے کہ آیا آپ کسی رعایت کے مستحق ہیں۔

اس صفحہ پر موجود لنکس ان صفحات پر لے جاتے ہیں جو انگریزی میں ہیں۔ اگر آپ ہم سے بات کرنا چاہیں، تو براہِ کرم ہماری زبان سے متعلق ہیلپ لائن کو *6044 790 0300 پر کال کریں۔


کیا آپ کو ٹی وی لائسنس کی ضرورت ہے؟

یونائیٹڈ کنگڈم، چینل آئی لینڈز اور آئل آف مین میں، اگر آپ ٹی وی پر دکھائے جارہے یا کوئی آن لائن ٹی وی سروس پروگرام لائیو دیکھتے یا انہیں ریکارڈ کرتے ہیں، تو آپ کو ایک ٹی وی لائسنس کی ضرورت ہوتی ہے۔ اس کا اطلاق کسی بھی زبان کے کسی بھی پروگرام پر ہوتا ہے، چاہے وہ دنیا میں کہیں سے بھی موصول ہورہا ہو۔

خواہ آپ ان پروگراموں کو دیکھنے یا ریکارڈ کرنے کے لیے کسی بھی آلے کا استعمال کررہے ہوں، اس کا اطلاق سبھی پر ہوتا ہے، بشمول:

  • ٹی وی سیٹس
  • لیپ ٹاپس اور ڈیسک ٹاپ کمپیوٹرز
  • ٹیبلیٹ اور پاکٹ کمپیوٹرز
  • موبائل فونز
  • گیمز کونسولز
  • سیٹیلائیٹ، کیبل اور ڈیجیٹل باکسیز، اور پرسنل ویڈیو ریکارڈرز (پی وی آرز)
  • ڈی وی ڈی، وی ایچ ایس اور بلیو - رے ریکارڈرز
  • یا کوئی اور ٹی وی وصول کرنے والا آلہ۔

ایک پتہ پر آپ کو صرف ایک ٹی وی لائسنس کی ضرورت ہوتی ہے، خواہ آپ بہت سارے آلات پی کیوں نہ استعمال کررہے ہوں۔ بغیر مشترکہ کرایہ داری معاہدہ (جوائنٹ ٹیننسی ایگریمینٹ) والے گھروں اور کاروباری اداروں کے لیے مختلف شرائط کا اطلاق ہوتا ہے، جہاں ایک سے زائد لائسنس کی ضرورت ہوتی ہے۔ اگر آپ کا کوئی دوسرا گھر بھی ہو، تو آپ کو اس پتہ کے لیے ایک علیحدہ لائسنس کی ضرورت ہوگی۔ مزید جاننے کے لیے کال کریں 6044 790 0300 پر

کیا حال ہی میں آپ نے گھر تبدیل کیا ہے؟

اگر آپ نے گھر تبدیل کیاہے، یا آپ کی جو تفصیلات ہمارے پاس ہیں، وہ غلط ہیں یا ان میں تبدیلی ہوئی ہے، تو براہِ کرم ہمیں اپنے نئے پتہ کی تفصیلات بتائیں یا ہمیں اس پتہ پر لکھیں TV Licensing, Darlington DL98 1TL۔

آپ ٹی وی نہیں دیکھتے ہیں؟

اگر آپ ٹی وی پر یا کسی آن لائن ٹی وی سروس پر لائیو دکھائے جارہے پروگراموں کو کبھی نہیں دیکھتے نہ ہی ریکارڈ کرتے ہوں– خواہ یہ ٹی وی، کمپیوٹر، ٹیبلٹ، موبائل فون، گیمز کونسول، ڈیجیٹل باکس پر ہو، ڈی وی ڈی/وی ایچ ایس ریکارڈر پر ہو یا کسی دیگر آلے پر – توآپ کو کسی ٹی وی لائسنس کی ضرورت نہیں ہے۔ براہِ کرم ہمیں بتائیں کہ آپ کو لائسنس کی ضرورت نہیں ہے یا ہمیں *6044 790 0300 پر کال کریں۔ کاروباری اداروں کے لیے مختلف شرائط کا اطلاق ہوتا ہے۔

اس کی تصدیق ہم آپ کے پتہ کا ایک فوری معائنہ کرکے کرسکتے ہیں۔ ایسا اس لیے ہے کہ جب ہم ان گھروں کا دورہ کرتے ہیں جن کا دعوی ہے کہ انہیں ٹی وی لائسنس کی ضرورت نہیں ہے، تو پانچ میں سے ایک گھر ایسا ہوتا ہے جسے درحقیقت ٹی وی لائسنس کی ضرورت ہوتی ہے۔

کیا آپ کو اپنے لائسنس کی اب مزید ضرورت نہیں رہی ہے؟

اگر آپ کے پاس ایک ٹی وی لائسنس ہے لیکن آپ اب ٹی وی پر نشر ہورہے پروگرام ٹی وی یا کسی دوسرے آلے پر نہیں دیکھتے یا ریکارڈ نہیں کرتے ہیں، تو ہوسکتا ہے کہ آپ رقم واپسی کے مستحق ہوں۔ برائے مہربانی مزید معلومات کے لیے *6044 790 0300 پر کال کریں۔

ایک ٹی وی لائسنس کی قیمت کیا ہے؟

ایک رنگین ٹی وی لائسنس کی قیمت 145.50£ سالانہ ہے۔ اگر آپ نابینا ہیں یا شدید بصری معذوری کا شکار ہیں، یا اگر آپ کی عمر 74 سال یا اس سے زائد ہے، تو آپ ایک مختصر مدتی، کم فیس پر یا مفت لائسنس کے مستحق ہو سکتے ہیں۔

اگر آپ بغیر ٹی وی لائسنس کے ٹی وی پر یا کسی آن لائن ٹی وی سروس پر لائیو نشر ہو رہے پروگراموں کو دیکھتے یا ریکارڈ کرتے ہیں، تو آپ قانون توڑ رہے ہیں۔ آپ کے خلاف مقدمہ چلایا جاسکتا ہے اور آپ پر 1,000£ تک کا جرمانہ عائد ہوسکتا ہے (جرسی میں زیادہ سے زیادہ جرمانہ 500£ اور گرنزی میں 2,000£ ہے)۔ اسکاٹ لینڈ میں، پروکیوریٹر فسکل اس امر کا فیصلہ کرے گا کہ آیا قانونی چارہ جوئی کی جائے یا نہیں۔

آپ اپنے ٹی وی لائسنس کی آن لائن ادائیگی یا تجدید بذریعہ ایک ڈیبٹ یا کریڈٹ کارڈ کر سکتے ہیں۔ متبادل طور پر، ذیل میں آپ وہ تمام طریقے دیکھ سکتے ہیں جن کے ذریعہ آپ لائسنس کے لیے ادائیگی کرسکتے ہیں۔ اگر آپ اپنے ٹی وی لائسنس کی تجدید کر رہے ہیں، تو آپ کو اپنے موجودہ لائسنس نمبر کی ضرورت ہوگی۔

ٹی وی لائسنس کے لیے ادائیگی کیسے کریں

آپ اپنے ٹی وی لائسنس کی لاگت کو سہ ماہی، ماہانہ یا ہفتہ واری قسطوں پر تقسیم کر سکتے ہیں، یا یک مشت ادا کر سکتے ہیں – جو بھی آپ کے لیے مناسب ہو۔

آپ کے ٹی وی لائسنس کی ادائیگی کا آسان ترین طریقہ، آن لائن ڈائرکٹ ڈیبٹ کرنا یا کریڈٹ کارڈ کے ذریعہ ادائیگی کرنا ہے۔

ادائیگی کے طریقے:

ڈائرکٹ ڈیبٹ

اپنے ٹی وی لائسنس کی لاگت کو ماہانہ، سہ ماہی یا سالانہ قسطوں میں تقسیم کرسکتے ہیں۔ ہم آپ کے لائسنس کے لیے خودکار طریقہ پر ادائیگی لے لیں گے، لہذا آپ کو کبھی بھی ادائیگی چوک جانے کے بارے میں فکر کرنے کی ضرورت نہیں ہوگی۔

آپ کی ڈائرکٹ ڈیبٹ ترتیب دے دیےجانے کے بعد، ہر سال آپ کے لائسنس کی خود کار طریقہ پر تجدید ہوجایا کرے گی، اس طرح کبھی بھی آپ کے بغیر لائسنس ہونے کا کوئی جوکھم نہیں ہوگا۔

اگر آپ گھر تبدیل کرتے ہیں، تو ہمیں بتانا یقینی بنائیں تاکہ ہم آپ کا ٹی وی لائسنس نئے پتہ پر منتقل کردیں۔

آپ آن لائن ڈائرکٹ ڈیبٹ سیٹ کرسکتے ہیں، یا اپنے بینک کی تفصیلات کے ساتھ ہمیں *6044 790 0300پر کال کرکے بھی ایسا کرسکتے ہیں۔ براہِ کرم نوٹ کرلیں کہ، اگر آپ سہ ماہی ادائیگی کا فیصلہ کرتے ہیں تو ہر ادائیگی میں 1.25£ کا چارج شامل کیا جائےگا۔

ڈیبٹ/کریڈٹ کارڈ

اپنے ٹی وی لائسنس کی ڈیبٹ یا کریڈٹ کارڈ کے ذریعہ ادائیگی، آن لائن، بذریعہ فون یا اپنے ڈیبٹ کارڈ کے ذریعہ کسی پے پوائنٹ پر (چینل آئی لینڈز میں پوسٹ آفس کی برانچ میں) کی جاسکتی ہے۔ براہِ کرم ادائیگی کرتے وقت اپنی تفصیلات اپنے پاس دستیاب رکھیں۔ اگر آپ اپنے ٹی وی لائسنس کی تجدید کر رہے ہیں، تو یہ آپ کے لیے مددگار ہوگا کہ آپ کے پاس اپنا موجودہ لائسنس نمبر موجود ہو۔

ٹی وی لائسنسنگ ادائیگی کارڈ

ایک ادائیگی کارڈ کے ذریعہ آپ اپنے ٹی وی لائسنس کی لاگت کی ادائیگی کو فی ہفتہ کم از کم 5.60£ تک میں تقسیم کرسکتے ہیں۔ آپ اس کا استعمال آن لائن، بذریعہ فون، بذریعہ متنی پیغام یا کسی پے پوائنٹ پر (یا چینل آئی لینڈز میں پوسٹ آفس میں) ادائیگی کے لیے کرسکتے ہیں۔ اگر آپ اپنے ٹی وی لائسنس کی تجدید کر رہے ہیں، تو یہ آپ کے لیے مددگار ہوگا کہ آپ کے پاس اپنا موجودہ لائسنس نمبر موجود ہو۔

مزید معلومات کے لیے اور اپنے ادائیگی کارڈ کی درخواست کرنے کے لیے، *0286 555 0300 پر کال کریں۔ کال کا جواب انگریزی میں دیا جائے گا، لیکن آپ کسی اپنے ہم زبان سے بات کرنے کے لیے کہہ سکتے ہیں۔

کہاں ادائیگی کریں:

آن لائن

آپ ہماری ویب سائٹ پر اپنے ٹی وی لائسنس کی ادائیگی اور اس کا نظم و نسق کرسکتے ہیں۔ آپ ہم سے اپنا ٹی وی لائسنس اور دیگر مواصلات بذریعہ ای میل وصول کرنے کے لیے بھی کہہ سکتے ہیں، لیکن آپ کے ای میل پتہ میں صرف انگریزی زبان کے حروف اور نمبر ہی ہونے چاہئیں۔

آپ اپنے ٹی وی لائسنس کی ادائیگی بذریعہ ڈیبٹ یا کریڈٹ کارڈ یا ایک ڈائرکٹ ڈیبٹ سیٹ کرکے بھی کرسکتے ہیں۔

براہِ کرم اپنے بینک کی تفصیلات کو سامنے دستیاب رکھیں، اور یاد رکھیں کہ ادائیگی کا فارم انگریزی زبان میں ہوگا۔

ٹیلیفون

اگر آپ کے پاس کوئی ڈیبٹ یا کریڈٹ کارڈ ہے – جیسے کہ میسٹرو، ڈیلٹا، سولو، ویزا یا ماسٹر کارڈ – تو آپ *6044 790 0300 پر کال کرکے بھی اپنے ٹی وی لائسنس کی ادائیگی کرسکتے ہیں۔ اس بات کو یقینی بنائیں کہ آپ کے کارڈ کی تفصیلات آپ کے سامنے موجود ہو۔

پے پوائنٹ

آپ کسی پے پوائنٹ پر جاکر ٹی وی لائسنس نقد یا ڈیبٹ کارڈ کے ذریعہ خرید سکتے ہیں۔ آپ کو دکان کے اہلکار کو بس اپنا نام اور پتہ بتانا ہوگا۔

پورے یو کے میں 27,000 سے زائد پےپوائنٹس ہیں، جو آپ کو کنوینیئنس اسٹورز، نیوز ایجنٹس، آف لائسنسز، سپرمارکیٹس اور پیٹرول اسٹیشنوں پر مل سکتے ہیں۔ ان میں سے بہت سے ہفتہ کے ساتوں دن کافی دیر تک کھلے ہوتے ہیں۔ آپ کو اپنا مقامی پے پوائنٹ یہاں مل سکتا ہے یا آپ *6137 790 0300 پر کال کرکے اپنا پوسٹل کوڈ دے کر معلوم کرسکتے ہیں (یہ ایک خودکار سروس ہے جو صرف انگریزی زبان میں دستیاب ہے)۔

چینل آئی لینڈز میں کوئی پے پوائنٹس موجود نہیں ہیں۔ یہاں آپ پوسٹ آفس کی برانچ میں ادائیگی کرسکتے ہیں۔

بذریعہ ڈاک

آپ اپنا چیکTV Licensing, Darlington DL98 1TL کے پتہ پر ارسال کرسکتے ہیں۔ براہِ کرم ٹی وی لائسنس کی پوری فیس کا اپنا چیک 'TV Licensing' کے نام واجب الادا بنائیں، اور چیک کی پشت پر اپنا نام، پتہ اور پوسٹل کوڈ لکھنا یاد رکھیں۔ برائے مہربانی نقد ارسال نہ کریں۔

رعایتی لائسنس کے لیے تخفیف شدہ فیس

74 سال یا اس سے زائد عمر کے افراد کے لیے، یا نابینا یا انتہائی کمزور بینائی والے افراد، اور ساتھ ہی کاروباری گاہکوں اور چینل آئی لینڈز یا آئل آف مین میں رہنے والوں کے لیے بعض مفید معلومات یہاں دی جارہی ہے۔

کیا آپ یا کوئی اور جس کے ساتھ آپ رہتے ہیں:

  • کی عمر 75 سال یا اس سے زیادہ ہے؟ آپ مفت ٹی وی لائسنس کے لیے اہل ہو سکتے ہیں۔ درخواست دینے کے لیے، بس آپ جس شخص کے لیے درخواست دے رہے ہیں اس کے قومی بیمہ نمبر کے ساتھ، یا اگر یہ موجود نہ ہو تو عمر کے کسی دیگر ثبوت کے ساتھ *6044 790 0300 پر کال کریں۔
  • کیا آپ 74 سال کے ہیں؟ آپ کسی مختصر مدتی ٹی وی لائسنس کے لیے درخواست دے سکتے ہیں جو آپ کی عمر 75 سال ہو جانے تک احاطہ فراہم کرے۔ برائے مہربانی مزید معلومات کے لیے *6044 790 0300 پر کال کریں۔ اگر آپ چینل آئی لینڈز یا آئل آف مین میں رہتے ہیں، تو مختلف شرائط کا اطلاق ہوسکتا ہے۔
  • نابینا ہیں اور مناسب ثبوت فراہم کرسکتے ہیں؟ آپ 50٪ رعایت کے مستحق ہیں۔ اگر آپ جزوی طور پر دیکھ سکتے ہیں (بصری معذوری کے شکار ہیں)۔– اپلائی کرنے کے لئے آن لائن– tvlicensing.co.uk/blind پر جائيں یا نابینا اشخاص کے اندراج کی اپنی دستاویز یا اپنے– آنکھوں کے ڈاکٹر کی جانب سے جاری کردہ کسی سرٹیفکیٹ کی ایک نقل ارسال کریں جس کے ساتھ اپنا لائسنس نمبر، فون نمبر اور چیک پیمنٹ کی تفصیلات TV  Licensing, Blind Concession Group, Darlington DL98 1TL کو بھیج دیں۔

کیا آپ چینل آئی لینڈ میں یا آئل آف مین میں رہتے ہیں؟

اگر آپ آئل آف مین یا گورنزی میں رہتے ہیں اور آپ – یا آپ کے ساتھ رہنے والا کوئی فرد – 75 سال یا اس سے زائد عمر کا ہے، تو آپ ایک مفت ٹی وی لائسنس کے مستحق ہیں۔

  • اگر آپ گورنزی میں رہتے ہیں، آپ کی عمر 65 سال یا اس سے زائد ہے، اور آپ سرکاری مراعات وصول کررہے ہیں، تو آپ ایک مفت ٹی وی لائسنس کا دعویٰ کرنے کے مستحق ہوسکتے ہیں۔ براہِ کرم گورنزی سوشل سیکورٹی ڈپارٹمنٹ سے 579 732 01481 پر رابطہ کریں۔
  • اگر آپ جرسی میں رہتے ہیں، اور آپ کی عمر 75 سال یا اس سے زائد ہے، اور آپ کی آمدنی کم ہے، تو آپ 75 سال سے زائد عمر والے افراد کے مفت ٹی وی لائسنس کے لیے اہل ہوسکتے ہیں۔ براہِ کرم جرسی سوشل سیکیورٹی ڈپارٹمنٹ سے 505 445 01534 پر رابطہ کریں۔
  • ہمیں افسوس ہے کہ، سارک کے رہائشی جن کی عمر 75 سال یا اس سے زائد ہے مفت ٹی وی لائسنس کے لیے اہل نہیں ہیں۔
  • چینل آئی لینڈز میں کوئی پے پوائنٹ نہیں ہے، لیکن آپ کسی بھی پوسٹ آفس میں ادائیگی کرسکتے ہیں۔

کاروباری گاہک

اگر آپ کا عملہ، گاہک، یا مہمان آپ کے فراہم کردہ کسی بھی ڈیوائس پریا کسی آن لائن ٹی وی سروس کے لائیو دکھائے جا رہے پروگراموں کو دیکھتے یا ریکارڈ کرتے ہیں تو ضروری ہے کہ آپ کے کاروباری احاطہ کے لیے ایک ٹی وی لائسنس موجود ہو۔

ایک لائسنس کی قیمت ہر ایک پتہ کے لیے ایک سال کے لیے 145.50£ ہے۔ اگر آپ کا کاروبار صرف ایک ہی احاطہ میں ہے، تو اس مقام پر استعمال ہونے والے تمام آلات کے لیے آپ کو صرف ایک ٹی وی لائسنس کی ضرورت ہوگی۔ اگر آپ کا کاروبار کئی احاطوں پر مشتمل ہے، تو آپ کو ایک کمپنی گروپ ٹی وی لائسنس کی ضرورت ہوگی۔

ایک واحد ٹی وی لائسنس کی ادائیگی کا آسان ترین طریقہ، ایک ڈیبٹ یا کریڈٹ کارڈ کے ذریعہ آن لائن یا ڈائرکٹ ڈیبٹ کے ذریعہ کرنا ہے۔ کمپنی گروپ ٹی وی لائسنس کی ادائیگی کے لیے، پتوں کی فہرست کے ساتھ مکمل ادائیگی (£145.50 فی پتہ) ہمیں بھیجیں۔ کوئی فارم نہیں پُر کرنا ہے۔ آپ کو صرف ایک ادائیگی ہر سال کرنی ہے، اور آپ کو صرف ایک یاد دہانی موصول ہوگی جو ایک واحد پتہ پر بھیجی جائے گی۔

بی اے سی ایس کے ذریعہ مکمل ادائیگی کریں، یا 'TV Licensing' کے نام واجب الادا ایک چیک TV Licensing Hotel & Company Group Licensing, Darlington DL98 1TL کے پتےپر بھیجیں۔ مزید معلومات کے لیے *6165 790 0300 پر کال کریں۔

ایک ٹی وی لائسنس مندرجہ ذیل کا احاطہ نہیں کرتا:

  • آپ کے احاطہ میں رہائشی اقامت گاہ،
  • آپ کے احاطہ میں لیکن کسی اور کے ذریعہ چلائے جارہے سوشل اور ویلفیئر کلب،
  • آپ کے ذریعہ کسی اور ادارے کو کرایہ پر دیا گیا احاطہ، یا
  • مہمان نوازی والے حصے۔

ہوٹلوں، ہوسٹلوں، موبائل یونٹوں اور کیمپ سائٹس کے لیے مختلف ضوابط ہیں۔

براہِ کرم نوٹ کرلیں: کہ اگر آپ کے احاطہ میں گاہکوں یا عملہ کے لیے – مثال کے طور پر ریڈیو، ٹی وی، کمپیوٹر یا سی ڈی/ڈی وی ڈی، پر موسیقی بجائی جاتی ہے – تو زیادہ تر معاملات میں آپ کو PRS اور PPL دونوں سے موسیقی لائسنس خریدنا ضروری ہوگا۔ مزید معلومات کے لیے prsformusic.com اور PPLUK.com پر جائیں۔

آپ کے ٹی وی لائسنس کے بارے میں

ٹی وی لائسنس خریدنے کے بعد ان شرائط وضوابط کا اطلاق ہوگا۔

یہ لائسنس آپ کو لائسنس یافتہ مقام پر ٹی وی پروگرام وصول کرنے والے آلات نصب کرنے، اور ٹی وی پر پیش کیے جانے والے پروگراموں کو دیکھنے اور ریکارڈ کرنے دیتا ہے۔ اس میں انٹرنیٹ پر اسٹریم کیے جانے والے پروگرام اور یو کے سے باہر سے نشر کیے جانے والےسیٹیلائیٹ پروگرام بھی شامل ہیں۔ آپ کسی بھی آلے پر ایسا کرسکتے ہیں، بشمول ٹی وی، کمپیوٹرز، ٹیبلٹس، موبائل فونز، گیمز کونسولز، ڈیجیٹل باکسز ڈی وی ڈی/ وی ایچ ایس ریکارڈرز یا کوئی دیگر شامل ہیں۔ اگر آپ ٹی وی نہیں دیکھتے یا ریکارڈ نہیں کرتے ہیں، یا صرف کیچ اپ یا حسب طلب سروس کا استعمال کرتے ہیں، تو آپ کو لائسنس کی ضرورت نہیں ہے۔

آپ یا کوئی اور جو معمول کے مطابق آپ کے ساتھ یہاں رہتے ہیں درج ذیل کرسکتے ہیں:

  • یہاں لائسنس یافتہ مقام پر ٹی وی پروگرام وصول کرنے والے آلات کی تنصیب اور استعمال۔
  • گاڑیوں، بوٹس، اور کاروانوں میں (ماسوائے غیر سیاحتی کاروانوں کے جب کوئی شخص لائسنس یافتہ مقام پرٹی وی دیکھتا یا ریکارڈ کرتا ہے) ٹی وی پروگرام موصول کرنے والے آلات کی تنصیب و استعمال۔
  • اپنی اندرونی بیٹری سے پاور حاصل کرنے والے کسی بھی آلے پر آپ ٹی وی دیکھ یا ریکارڈ کرسکتے ہیں۔

آپ یا کوئی اور جو معمول کے مطابق آپ کے ساتھ یہاں کام کرتے ہوں درج ذیل کرسکتے ہیں:

  • یہاں لائسنس یافتہ مقام پر ٹی وی پروگرام وصول کرنے والے آلات کی تنصیب اور استعمال۔
  • کاروباری مقاصد کے لیے استعمال کی جانے والی گاڑیوں، بوٹوں یا کاروانوں میں ٹی وی پروگرام وصول کرنے والے آلات کی تنصیب اور استعمال۔

یہ لائسنس مکمل طور پر کرایہ داروں، لاج میں قیام کرنے والوں، یا پیئنگ گیسٹ کے زیر استعمال علاقوں کا احاطہ نہیں کرتا۔ یہ لائسنس ان علاقوں کا احاطہ بھی نہیں کرتا جو خود کفیل ہیں، ایسے علاقے جو علیحدہ قانونی انتظام کے تحت احاطہ کردہ ہیں یا کاروباری احاطہ کے ایسے علاقے جو کسی اور مقصد سے استعمال کیے جارہے ہیں۔ مزید جاننے کے لیے براہِ کرم ہم سے رابطہ کریں۔

دیگر شرائط۔ ہم آپ کا لائسنس تبدیل یا منسوخ کرسکتے ہیں۔ اگر ہم نے اسے منسوخ کرتے ہیں، تو ہم آپ کو بتائیں گے۔ اگر ہم نے لائسنس کی شرائط میں تبدیلی کی ہے تو ہم ایک اطلاع عام بی بی سی کی ویب سائٹ پر شائع کریں گے اور اگر ہم نے مناسب سمجھا تو دیگر قومی ذرائع ابلاغ میں بھی شائع کریں گے۔ ہمارے افسر ہمارے ریکارڈ اور آپ کے ٹی وی وصول کرنے والے آلات کا معائنہ کرنے کے لیے آسکتے ہیں۔ آپ کے لیے انہیں گھر کے اندر آنے دینا لازمی نہیں ہے۔ آپ کے ٹی وی وصول کرنے والا آلے کو ٹی وی اور ریڈیو کی وصولیابی میں کوئی بے جا مداخلت نہیں کرنی چاہیے۔

اگرچہ آپ کے پاس سفید و سیاہ ٹی وی ہو، تب بھی ٹی وی پروگراموں کو ریکارڈ کرنے کے لیے آپ کو ایک رنگین لائسنس کی ضرورت ہوتی ہے۔ کیونکہ ڈی وی ڈی، وی ایچ ایس اور ڈیجیٹل باکس ریکارڈر رنگین ریکارڈنگ کرتے ہیں۔ ایک سیاہ و سفید لائسنس اسی صورت میں جائز ہوگا جب آپ ایک ایسے ڈیجیٹل باکس کا استعمال کرتے ہوں جس پر ٹی وی پروگرام ریکارڈ نہیں کئے جاسکتے ہوں۔

دیگر اہم معلومات

  • جب بھی آپ ہمیں کال کریں یا لکھیں، ہمیشہ اپنا ٹی وی لائسنس نمبر ضرور لکھیں اگر آپ کے پاس ہو۔
  • آپ کی معلومات کا استعمال صرف ٹی وی لائسنسگ (بی بی سی اور اس کے خدمت فراہم کاران) کے ذریعہ ٹی وی لائسنس سسٹم کی نگرانی کرنے، بشمول لائسنس کی درخواست، فیس اکٹھا کرنے اور اس کے نفاذ کے لیے کرے گی۔ ہم آپ کی منظوری حاصل کیے بغیر اسے ٹی وی لائسنسنگ کے باہر کسی کو فراہم نہیں کریں گے، تاوقتیکہ ہمیں قانون کے ذریعہ ایسا کرنے کے لیے مجبور یا اجازت یافتہ نہ ہوں۔ مزید معلومات یہاں سے حاصل کریں tvlicensing.co.uk/privacypolicy۔ ڈیٹا کے تحفظ سے متعلق کوئی بھی پوچھ تاچھ یہاں کی جاسکتی ہے Data Protection Manager, TV Licensing, Darlington DL98 1TL.

* ہمارے 0300 نمبر کو کی جانے والی کال کی شرح 01 یا 02 نمبر والی قومی کال سے زیادہ نہیں ہوتی، خواہ کسی لینڈ لائن سے کی جائے یا موبائل فون سے۔ لینڈ لائن سے کی جانے والی کالز پر عموماً 9p فی منٹ کا چارج لیا جاتا ہے اور موبائل فون سے کی جانے والی کالز کے لیے 8p اور 40p فی منٹ کے درمیان چارج کیا جاتا ہے۔ اگر آپ کو اپنے موبائل یا لینڈ لائن کے لیے پلان میں شامل منٹ ملتے ہیں، تو اس میں 0300 کو کی جانے والی کالیں بھی شامل ہوں گی۔