Gwybodaeth am y Drwydded Deledu

Mae’r gyfraith wedi newid. Erbyn hyn mae’r Drwydded Deledu yn eich trwyddedu hefyd i lawrlwytho neu wylio unrhyw rai o raglenni’r BBC ar iPlayer. Dysgwch fwy

Mae arnoch angen Trwydded Deledu i

  • wylio neu recordio rhaglenni wrth iddyn nhw gael eu dangos ar deledu neu’n fyw ar wasanaeth teledu ar lein
  • lawrlwytho neu wylio unrhyw rai o raglenni’r BBC ar iPlayer.

Gallai hyn fod ar unrhyw ddyfais, gan gynnwys teledu, cyfrifiadur bwrdd gwaith, gliniadur, ffôn symudol, tabled, consol gemau, bocs digidol neu beiriant recordio DVD/VHS.

Mae Trwydded Deledu lliw safonol yn costio £145.50. Gallwch dalu’r cyfan ar unwaith neu ddewis rhannu’r gost. Mae’r dudalen yma hefyd yn rhoi gwybod i chi am y gwahanol ffyrdd y gallwch dalu, trwyddedau ar gyfer busnesau, ac a ydych yn gymwys i gael consesiwn.

Mae dolenni ar y dudalen yma’n mynd i dudalennau Saesneg. Petai’n well gennych siarad â ni, ffoniwch ein Llinell Gymraeg ar 0300 790 6042*.


A oes arnoch angen Trwydded Deledu?

Yn y Deyrnas Unedig, Ynysoedd y Sianel ac Ynys Manaw, mae arnoch angen Trwydded Deledu os ydych yn

  • gwylio neu’n recordio rhaglenni teledu byw ar unrhyw sianel neu ddyfais (mewn unrhyw iaith, sydd wedi’u derbyn o unrhyw le yn y byd), neu’n
  • lawrlwytho neu’n gwylio rhaglenni’r BBC ar iPlayer.

Mae hyn yn berthnasol hefyd i unrhyw ddyfais a darparwr rydych yn eu defnyddio, gan gynnwys:

  • Setiau teledu (gan gynnwys teledu clyfar)
  • Peiriannau recordio DVD, Blu-ray a VHS
  • Gliniaduron a chyfrifiaduron bwrdd gwaith
  • Tabledi, ffonau symudol a dyfeisiau cludadwy eraill
  • Bocsys digidol neu PVR (fel Sky, Virgin Media neu BT TV)
  • Consolau gemau
  • Dyfeisiau ffrydio cyfryngau (fel Amazon Fire TV, Apple TV, Chromecast, Roku a Now TV)
  • Freeview, Freesat neu YouView

Fel arfer bydd arnoch angen un Drwydded Deledu yn unig ar gyfer pob cyfeiriad, hyd yn oed os byddwch yn defnyddio llawer o ddyfeisiau. Mae gwahanol amodau yn gymwys ar gyfer cartrefi heb gytundeb cyd-denantiaeth a busnesau, ble gallai fod angen mwy nag un drwydded. Os oes gennych ail gartref, bydd arnoch angen trwydded ar wahân ar gyfer y cyfeiriad hwnnw. Cewch wybod mwy trwy ffonio 0300 790 6042.

Rydych yn torri’r gyfraith os ydych yn gwylio neu’n recordio rhaglenni teledu byw ar unrhyw sianel neu ddyfais, neu’n lawrlwytho neu’n gwylio rhaglenni’r BBC ar iPlayer, heb drwydded. Rydych yn mentro cael eich erlyn a dirwy o hyd at £1,000 ynghyd ag unrhyw gostau cyfreithiol a/neu iawndal y gallech gael eich gorchymyn i’w talu.

Mae yna ychydig o eithriadau o ran pryd nad oes arnoch angen Trwydded Deledu ar gyfer BBC iPlayer. Does arnoch ddim angen un os byddwch ond yn gwylio teledu S4C ar alw, gwrando ar y radio, a gwylio ffilmiau neu sioeau teledu rydych wedi’u prynu ar BBC Store.

Ydych chi wedi symud tŷ yn ddiweddar?

Os ydych wedi symud tŷ, neu os yw’r manylion sydd gennym amdanoch yn anghywir neu wedi newid, rhowch fanylion eich cyfeiriad newydd i ni neu ysgrifennwch atom yn Trwyddedu Teledu, Darlington DL98 1TL.

Ddim yn gwylio teledu byw neu BBC iPlayer?

Os na fyddwch byth yn gwylio neu’n recordio unrhyw raglenni teledu byw ar unrhyw sianel neu ddyfais, ac na fyddwch byth yn lawrlwytho neu’n gwylio rhaglenni’r BBC ar iPlayer, does arnoch ddim angen Trwydded Deledu. Rhowch wybod i ni nad oes arnoch angen trwydded neu ffoniwch 0300 790 6042*. Mae amodau gwahanol yn gymwys i fusnesau.

Os byddwch yn dweud wrthym nad oes arnoch angen trwydded, gallwn ymweld â chi i gadarnhau nad oes angen trwydded. Mae’r ymweliadau yma’n angenrheidiol oherwydd, wrth i ni gysylltu, byddwn yn darganfod bod angen trwydded mewn gwirionedd ar bron i un mewn chwech o bobl a ddywedodd wrthym nad oes arnynt angen trwydded.

Ddim angen eich trwydded erbyn hyn?

Os oes gennych Drwydded Deledu ond nad ydych yn gwylio neu’n recordio unrhyw raglenni teledu byw ar unrhyw sianel neu ddyfais erbyn hyn, ac nad ydych yn lawrlwytho neu’n gwylio rhaglenni’r BBC ar iPlayer erbyn hyn, fe allech fod yn gymwys i gael ad-daliad. I gael gwybod mwy, ffoniwch ni ar 0300 790 6042*.

Beth yw cost Trwydded Deledu?

Mae Trwydded Deledu lliw yn costio £145.50 y flwyddyn. Os ydych yn ddall (â nam difrifol ar eich golwg) neu os ydych yn 74 mlwydd oed neu drosodd, fe allech fod yn gymwys i gael trwydded tymor byr, ffi is neu drwydded am ddim.

Gallwch dalu am eich Trwydded Deledu neu ei hadnewyddu ar lein gyda cherdyn debyd neu gredyd. Neu, mae’r holl ffyrdd gwahanol o dalu am drwydded i'w gweld isod. Os ydych yn adnewyddu eich Trwydded Deledu, bydd arnoch angen rhif eich trwydded bresennol.

Sut i dalu am eich Trwydded Deledu

Gallwch dalu’r cyfan ar unwaith neu ddewis rhannu’r gost bob chwarter, bob mis neu bob wythnos.

Y ffordd hawsaf o dalu am eich Trwydded Deledu yw ar lein, trwy Ddebyd Uniongyrchol neu gyda cherdyn debyd neu gredyd.

Ffyrdd o dalu:

Debyd Uniongyrchol

Gallwch dalu am eich Trwydded Deledu fel un swm, neu rannu’r gost bob mis neu bob chwarter. Fe wnawn ni gasglu’r taliadau ar gyfer eich trwydded yn awtomatig, fel na fydd raid i chi boeni am fethu taliad fyth eto.

Ar ôl trefnu eich Debyd Uniongyrchol, fe fydd eich trwydded yn cael ei hadnewyddu’n awtomatig ar eich rhan bob blwyddyn, fel na fyddwch byth yn mentro bod heb drwydded.

Os byddwch yn symud tŷ, cofiwch roi gwybod i ni fel y gallwn symud eich Trwydded Deledu i’ch cyfeiriad newydd.

Gallwch drefnu Debyd Uniongyrchol ar lein, neu drwy ffonio 0300 790 6042* gyda’ch manylion banc wrth law. Cofiwch os byddwch yn penderfynu talu bob chwarter, byddwn yn ychwanegu premiwm o £1.25 at bob taliad.

Cerdyn debyd/credyd

Talwch am eich Trwydded Deledu gyda cherdyn debyd neu gredyd ar lein, dros y ffôn neu gyda’ch cerdyn debyd mewn PayPoint. Cofiwch sicrhau fod eich manylion wrth law pan fyddwch yn talu. Os ydych yn adnewyddu eich Trwydded Deledu fe fydd yn ddefnyddiol cael rhif eich trwydded bresennol wrth law.

Cerdyn talu Trwyddedu Teledu

Gallwch rannu cost eich Trwydded Deledu o gyn lleied â £5.60 yr wythnos gyda cherdyn talu. Gallwch ei ddefnyddio i dalu ar lein, dros y ffôn, trwy neges destun neu mewn unrhyw PayPoint. Os ydych yn adnewyddu eich Trwydded Deledu fe fydd yn ddefnyddiol cael rhif eich trwydded bresennol wrth law.

I gael gwybod mwy a gwneud cais am eich cerdyn talu, ffoniwch 0300 555 0286*. Bydd yr alwad yn cael ei hateb yn Saesneg, ond gallwch ofyn am gael siarad â rhywun yn Gymraeg.

Lle i dalu:

Ar lein

Gallwch dalu am eich Trwydded Deledu a’i rheoli ar ein gwefan. Gallwch hefyd ofyn i gael derbyn eich Trwydded Deledu ac unrhyw negeseuon eraill gennym trwy e-bost, ond rhaid i’ch cyfeiriad e-bost gynnwys rhifau a llythrennau Saesneg yn unig.

Gallwch dalu am eich Trwydded Deledu un ai drwy gerdyn debyd neu gredyd neu drwy drefnu Debyd Uniongyrchol.

Dylech fod â’ch manylion banc wrth law, a chofiwch y bydd y ffurflen dalu yn Saesneg.

Ffôn

Os oes gennych gerdyn debyd neu gredyd - fel Maestro, Delta, Solo, Visa neu MasterCard - gallwch dalu am eich Trwydded Deledu trwy ffonio 0300 790 6042*. Cofiwch wneud yn siŵr fod manylion eich cerdyn wrth law.

PayPoint

Gallwch fynd i unrhyw PayPoint a phrynu Trwydded Deledu gydag arian parod neu gerdyn debyd. Bydd angen i chi roi eich enw a’ch cyfeiriad i’r gweithwyr siop a thalu’r ffi lawn o £145.50 gydag arian parod neu gerdyn debyd.

Mae yna dros 28,000 o safleoedd PayPoint ar hyd a lled y Deyrnas Unedig, sydd i'w cael mewn siopau cyfleus, siopau papurau newydd, siopau trwyddedig, archfarchnadoedd a gorsafoedd petrol. Mae llawer ar agor am oriau hir, saith diwrnod yr wythnos. Gallwch ddod o hyd i’ch PayPoint lleol yma neu drwy ffonio 0300 790 6137* a rhoi eich côd post (gwasanaeth awtomataidd yw hwn sydd ar gael yn Saesneg yn unig).

Post

Gallwch anfon siec at Trwyddedu Teledu, Darlington DL98 1TL. Ysgrifennwch y siec i ‘Trwyddedu Teledu; am ffi lawn y drwydded, a chofiwch ysgrifennu eich enw, cyfeiriad a chôd post ar gefn y siec. Peidiwch ag anfon arian parod.

Allech chi gael consesiwn?

Os ydych yn ddall (â nam difrifol ar eich golwg), fe allech fod yn gymwys i gael consesiwn o 50%. Ac os ydych yn 74 mlwydd oed neu drosodd, fe allech fod yn gymwys i gael trwydded tymor byr neu drwydded am ddim.

A ydych chi, neu a oes rhywun rydych yn byw gyda nhw:

  • Yn 75 mlwydd oed neu drosodd? Gallech fod yn gymwys i gael Trwydded Deledu am ddim. I wneud cais, ffoniwch 0300 790 6042* gyda rhif Yswiriant Gwladol y sawl rydych yn gwneud cais ar ei gyfer wrth law, neu ffordd arall o brofi oedran os nad oes gennych rif.
  • Yn 74 mlwydd oed? Gallwch wneud cais am Drwydded Deledu tymor byr i’ch trwyddedu hyd at eich pen-blwydd yn 75. Ffoniwch 0300 790 6042* i gael gwybod mwy.
  • Yn ddall ac yn gallu darparu’r dystiolaeth briodol? Rydych yn gymwys i wneud cais am gonsesiwn o 50%. Os ydych yn gweld yn rhannol (â nam ar eich golwg) dydych chi ddim yn gymwys. I wneud cais, ewch ar lein yn tvlicensing.co.uk/blind neu postiwch lungopi o’ch dogfen cofrestru’n ddall neu dystysgrif gan eich offthalmolegydd gyda rhif eich trwydded, rhif ffôn a thaliad trwy siec at Trwyddedu Teledu, Grŵp Consesiwn i Bobl Ddall, Darlington DL98 1TL.
Busnesau a sefydliadau

Mae angen i’ch safle busnes gael Trwydded Deledu os yw staff, cwsmeriaid neu westeion yn gwylio neu’n recordio rhaglenni teledu byw ar unrhyw sianel, neu’n lawrlwytho neu’n gwylio rhaglenni’r BBC ar iPlayer. Mae hyn yn gymwys i unrhyw ddyfais rydych chi wedi’i darparu, yn ogystal ag unrhyw rai o’u dyfeisiau eu hunain sydd wedi’u plygio i’r prif gyflenwad.

Os mai un safle sydd gan eich busnes, gallech fod angen un Drwydded Deledu yn unig. Mae trwydded yn costio £145.50 y flwyddyn ar gyfer pob cyfeiriad a bydd yn trwyddedu pob dyfais sy’n cael ei defnyddio yn y cyfeiriad hwnnw. Y ffordd hawsaf o dalu am Drwydded Deledu unigol yw ar lein gyda cherdyn debyd neu gredyd, neu drwy Ddebyd Uniongyrchol.

Os oes arnoch angen trwyddedu mwy nag un cyfeiriad, y ffordd symlaf o wneud hynny yw gyda Thrwydded Deledu Grŵp i Gwmnïau. Does dim ffurflenni i'w llenwi. Bydd angen i chi wneud un taliad bob blwyddyn yn unig, a byddwch yn derbyn un llythyr atgoffa a fydd yn cael ei anfon i un cyfeiriad. I dalu am Drwydded Deledu Grŵp i Gwmnïau, rhowch alwad i ni ar 0300 790 6165* a byddwn yn falch o helpu.

Nid yw Trwydded Deledu yn trwyddedu:

  • llety preswyl ar eich safle,
  • clybiau lles neu gymdeithasol ar eich safle ond sy’n cael eu rhedeg gan rywun arall,
  • safle sy’n cael ei is-osod gennych i sefydliadau eraill, neu
  • fannau croeso.

Mae rheolau gwahanol hefyd ar gyfer gwestai, hosteli, unedau symudol a gwersyllfeydd.

Sylwch: os oes cerddoriaeth yn cael ei chwarae weithiau ar eich safle ar gyfer cwsmeriaid neu staff – trwy radio, teledu, cyfrifiadur neu CD/DVD, er enghraifft – yn y rhan fwyaf o achosion bydd angen i chi brynu trwyddedau cerddoriaeth oddi wrth PRS for Music a PPL hefyd. Ewch i prsformusic.com a PPLUK.com i gael gwybod mwy.

Beth yw telerau ac amodau Trwydded Deledu safonol?

Mae Chi yn golygu’r sawl sy’n cael ei enwi ar y drwydded.

Pam mae angen Trwydded Deledu?

I ddefnyddio a gosod offer derbyn teledu yn y lle trwyddedig. Mae’n trwyddedu:

  • a) gwylio a recordio rhaglenni wrth iddyn nhw gael eu dangos ar deledu neu’n fyw ar wasanaeth teledu ar lein, gan gynnwys rhaglenni wedi’u ffrydio dros y rhyngrwyd a rhaglenni lloeren o’r tu allan i’r Deyrnas Unedig, a
  • b) gwylio a lawrlwytho rhaglenni’r BBC ar alw, gan gynnwys teledu dal i fyny, ar BBC iPlayer.

Gall hyn fod ar unrhyw ddyfais, gan gynnwys setiau teledu, cyfrifiaduron bwrdd gwaith, gliniaduron, ffonau symudol, tabledi, consolau gemau, bocsys digidol, peiriannau recordio DVD, Blu-ray a VHS, neu unrhyw beth arall.

Mae’r drwydded yn gadael i chi ddefnyddio a gosod offer derbyn teledu:

  • Yn y lle trwyddedig gan unrhyw un.
  • Mewn cerbyd, cwch neu garafán:
    • Gennych chi ac unrhyw un sydd fel arfer yn byw yma gyda chi yn y lle trwyddedig (ac eithrio carafanau nad ydynt yn rhai teithiol pan fydd rhywun yn gwylio neu’n recordio teledu yn y lle trwyddedig).
    • Gan unrhyw un sydd fel arfer yn gweithio yn y lle trwyddedig (ar yr amod nad yw’r cerbyd, cwch neu garafán yn cael eu defnyddio am reswm busnes).
  • Defnyddio offer derbyn teledu sy’n rhedeg ar ei fatrïau mewnol ei hun yn unrhyw le gennych chi ac unrhyw un sydd fel arfer yn byw gyda chi yn y lle trwyddedig.

Fel arfer, nid yw’r drwydded yma’n trwyddedu:

  • Mannau lle mae tenantiaid, lojars neu westeion sy’n talu yn preswylio yno’n unig.
  • Mannau sy’n hunangynhwysol.
  • Mannau wedi’u trwyddedu gan drefniadau cyfreithiol ar wahân.
  • Safleoedd busnes sy’n cael eu defnyddio am bwrpas gwahanol.

Trwyddedau du a gwyn

Hyd yn oed os oes gennych deledu du a gwyn, mae arnoch angen trwydded lliw i recordio rhaglenni. Y rheswm yw bod peiriannau recordio DVD, VHS a bocsys digidol yn recordio mewn lliw. Mae trwydded du a gwyn yn ddilys ar yr amod eich bod yn defnyddio bocs digidol sy’n methu recordio rhaglenni teledu.

Amodau eraill

  • Gallwn ganslo neu newid eich trwydded. Os byddwn yn ei chanslo, fe wnawn ni roi gwybod i chi.
  • Os byddwn yn newid amodau’r drwydded, byddwn yn cyhoeddi hysbysiad cyffredinol ar wefan y BBC ac, os byddwn yn ystyried hynny’n briodol, mewn cyfryngau cenedlaethol eraill.
  • Gall ein Swyddogion ymweld â’r lle trwyddedig i edrych ar ein cofnodion ac archwilio’r offer derbyn teledu. Does dim rhaid i chi adael iddyn nhw ddod i mewn.
  • Rhaid i’r offer derbyn teledu beidio ag achosi ymyriant afresymol i dderbyniad radio neu deledu.

Meddwl efallai fod arnoch angen Trwydded Deledu? Edrychwch nawr.

Sylwch: mae telerau ac amodau ar wahân yn gymwys i’r mathau canlynol o Drwydded Deledu: Trwydded Deledu gwestai ac unedau symudol, Trwydded Deledu gonsesiwn ARC a Thrwydded Deledu unedau adloniant. Os oes gennych un o’r rhain, trowch at eich trwydded am delerau ac amodau penodol neu cysylltwch â ni am wybodaeth.

Nid yw galwadau i’n rhifau 0300 yn costio dim mwy na galwad ar gyfradd genedlaethol i rif 01 neu 02, boed hynny o ffôn symudol neu linell dir. Yn nodweddiadol mae galwadau o linellau tir yn costio hyd at 9c y funud ac mae galwadau o ffonau symudol yn nodweddiadol yn costio rhwng 8c a 40c y funud. Os ydych yn cael munudau cynhwysol gyda’ch ffôn symudol neu linell dir, bydd galwadau i rif 0300 yn cael eu cynnwys.